Orlofshúsareglur


Sumarútleiga (júní-ágúst)


Vetrarútleiga

Flest húsa okkar eru til útleigu að vetri til. Þá er ekki stuðst við punktakerfi heldur ræður hver pantar fyrstur. Vetrarúthlutun skerðir ekki rétt til sumarúthlutunar nema um páska.  Helgar leigjast út frá kl. 16:00 á föstudegi til kl. 12:00 á mánudegi.  Mánudagar til föstudaga eru leigðir út í dagsleigu og því hægt að lengja helgar í annan hvorn eða báða enda.


ATH; Veður og færð.

Hamli veður eða færð, þannig að leigjandi komist ekki í orlofsbústað þarf, áður en leiga hefst, að tilkynna um slíkt til félagsins með tölvupósti (fit@fit.is). Það er forsenda til endurgreiðslu á leigu. Við slíkar aðstæður er um fulla endurgreiðslu að ræða. Minnt er á að endurgreiðsla er alltaf í formi inneignar á orlofsvef FIT. Almennt er ekki um snjómokstur að ræða að bústöðum FIT. Leigutakar eru hvattir til að kynna sér veðurspá og færð á vegum áður en lagt er af stað. . Ferðalög til og frá orlofsbústöðunum eru alfarið á ábyrgð leigjenda. FIT greiðir ekki kostnað sem leigutaki kann að verða fyrir vegna veðurs eða ófærðar, svo sem eldsneyti, mat eða gistingu. 


Pantað á vefnum

Þegar pantað er á vefnum þarf að skrá sig inn með Íslykli eða rafrænum skilríkjum. Þá er valið "Laus tímbil" úr valmynd.  Veljið viðeigandi mánuð og tímabil.  Þá þarf að ýta á hnapp neðst á síðunni "Senda" og siðan "Staðfesta".  Næsta skref er að "Samþykkja" skilmála og síðan þarf að haka við "Samþykkt" og velja hnappinn "Greiða."  Þú hefur 10 mínútur til að bóka orlofshús eftir það dettur þú út nema þú sért búinn að velja greiðslu í kortagátt þá gefast aðrar 10 mínútur til að greiða með kreditkorti áður en bókun dettur út.  Kvittun og leigusamningur sendist á uppgefið tölvupóstfang að greiðslu lokinni.  Þeir sem ekki hafa kreditkort þurfa að hafa samband við skrifstofu til að ganga frá greiðslu.


Öryggisnúmerin

Ef slys ber að höndum, hafið þá samband við neyðarlínuna í síma 112 og gefið upp öryggisnúmer hússins sem þið eruð stödd í.


Úthlutunarreglur

Á sumrin eru húsin og íbúðirnar leigðar félagsmönnum til vikudvalar í senn, en á öðrum tímum eftir samkomulagi. Úthlutun fer fram eftir punkta-kerfi og eru reglur um ávinnslu og frádrátt punkta eftirfarandi:


Ávinnsla punkta

Hver félagsmaður sem greitt hefur fullt félagsgjald ávinnur sér einn punkt fyrir hvern mánuð sem hann er í félaginu.


Frádráttur punkta við úthlutun

- Frá fyrsta föstudegi júnímánaðar til síðasta föstudags í júní eru dregnir frá 26 punktar.
- Frá síðasta föstudegi júnímánaðar fram í miðjan ágúst eru dregnir frá 36 punktar.
- Frá miðjum ágúst til fyrsta föstudags í september og einnig um páska eru dregnir frá 26 punktar.
- Við úthlutun á öðrum tímum koma engir punktar til frádráttar.
Ef fleiri en ein umsókn er um sama húsið á sama tímabili ræður punktafjöldi hver hreppir hnossið. Ef punktafjöldi er jafn ræður sú umsókn sem berst fyrst. Á umsóknareyðublöðum um orlofshús er gefinn kostur á allt að sex valmöguleikum. Því fleiri valkosti sem merkt er við, þeim mun meiri líkur eru á úthlutun. Vetrarúthlutun skerðir ekki rétt til sumarúthlutunar.

Gæludýr

Gæludýraeigendur hafa leyfi til að nýta sér tvö orlofshús FIT til samveru með sínum gæludýrum.
Orlofshúsin sem um ræðir þar sem gæludýr eru leyfð eru Kiðárbotnar 1 í Húsafelli og Skógarás 1 í Úthlíð.
Vinsamlegast athugið að lausaganga hunda er ekki leyfð á svæðinu.
Fólki með ofnæmi fyrir dýrum er ráðlagt að fara ekki í þessa bústaði.
Gæludýr eru stranglega bönnuð í orlofshúsum nema í þessum tveimur húsum.


Áminning
 Leigutaka ber að hafa leigusamning til staðar á meðan á dvöl stendur. Leigutaki ber ábyrgð á umgengni við orlofshús, orlofssvæði og aðrar eigur FIT eftir almennum reglum skaðabótaréttar og leiguréttar, þ.e. að almennt skulu greiddar skaðabætur sem nema þeim útgjöldum sem tjón bakar Orlofssjóði, ef tjóni er valdið af ásetningi eða gáleysi af félagsmanni eða gesti hans. 
Heimild er fyrir því að áminna félagsmann vegna umgengni og/eða skemmda á eign/eigum Orlofssjóðs. Félagsmanni gefst þó tækifæri á að skýra mál sitt við stjórn FIT áður en endanleg áminning verður ákveðin, allt að tvö ár. Ef brot félagsmanns er ítrekað þá missir sjóðfélagi rétt til nýtingar á orlofstilboðum næstu fimm ár. 

Ábending

Félagsmaður getur ekki leigt orlofshús oftar en þrisvar sinnum á hverju tímabili.

Vakin er athygli á því að orlofseignir FIT eru aðeins fyrir félagsmenn FIT. Ef félagsmaður er uppvís af því að framleigja öðrum eignina þá er varanlega lokað fyrir umsóknir þeirra fyrir leigu á orlofseignum FIT.

Aðeins er hægt að velja eitt orlofshús fyrir helgar- eða vikuleigu. Ekki er heimilt að leigja fleiri en það á hvern félagsmann.